Comunicación ás familias.

Estimadas familias,

Como xa manifestamos con anterioridade neste blogue e por medio da aplicación AbalarMóbil as circunstancias que estamos a vivir nos centros educativos son inéditas e extraordinarias en todos os eidos.

Dende que comezou o Estado de Alarma os docentes estamos a poñer unha serie de ferramentas telemáticas a disposición do alumnado para que o peche dos colexios non supoña, canto menos, un paso atrás na evolución académica dos seus fillos e fillas.

Se ben é certo,  os recursos dixitais, o acceso aos mesmos e as circunstancias profesionais e privadas de cada unidade familiar é dispar. Por este motivo, dende o noso nivel prentendimos que os contidos propostos semanalmente tivesen un espírito de revisión e non de avance ou progresión xa que non todos os alumnos e alumnas contan cos medios para desenvolver de xeito efectivo as actividades propostas.

Nos vindeiros días ou semanas, segundo vaian sucedendo os acontecementos, o método de traballo dos centros educativos poderá variar adaptándose ás necesidades que vaian xurdindo. Polo momento, e seguindo a premisa do Centro Autonómico de Formación e Innovación de Galicia, as directrices de traballo aconsellan que a planificación debe facerse por titoría e non por  materia para non sobrecargar ao alumnado. No noso caso, a través do blogue, quixemos integrar as materias que consideramos capitais para favorecer o seguimento das rutinas diarias de estudo dos alumnos.

Por outra banda gustaríanos aproveitar este espazo para facer unha serie de puntualizacións ao respecto das tarefas:

1. Non é preciso imprimir ninguna actividade. Todas as actividades que foron subidas ao blogue teñen un título de entrada coa materia, a semana en curso e os exercicios están numerados, polo tanto poden levarse a cabo simplemente cun caderno ou folio.

2. Os titores estamos traballando en conxunto  tratando de elaborar e programar contidos que se adapten a ambos grupos mais, os horarios dos grupos, as necesidades específicas do alumnado a fase ou estadio no que cada grupo se atopaba no momento do peche dos colexios é, evidentemente, distinta. Sen voltar a mencionar a fenda dixital dalgúns alumnos e alumnas.

3. As recomendacións por parte do profesorado seguen a ser as mesmas: lectura e escritura diaria, repaso do estudado ata o momento (para iso están as actividades) e emprego dos dispositivos dixitais de xeito responsable.

4. Por último, lembrarlles que as actividades propostas son altamente recomendables pero non teñen caracter avaliable.

Sen outro particular agardamos que todo vaia ben, agradecemos os ánimos e o apoio que moitos de vostedes nos están a trasladar e ansiamos que axiña poidamos voltar á normalidade.

Saúdos e saúde.

Segundo Ciclo